Aapadunmoolana Sri Durga Stotram - ఆపదున్మూలన శ్రీ దుర్గా స్తోత్రం

విషయ సూచిక - ముఖ్య విషయాలు

|| ఆపదున్మూలన శ్రీ దుర్గా స్తోత్రం || 

లక్ష్మీశే యోగనిద్రాం ప్రభజతి భుజగాధీశతల్పే సదర్పా-

-వుత్పన్నౌ దానవౌ తచ్ఛ్రవణమలమయాంగౌ మధుం కైటభం చ |

దృష్ట్వా భీతస్య ధాతుః స్తుతిభిరభినుతాం ఆశు తౌ నాశయంతీం

దుర్గాం దేవీం ప్రపద్యే శరణమహమశేషాపదున్మూలనాయ || 1 ||

 

యుద్ధే నిర్జిత్య దైత్యస్త్రిభువనమఖిలం యస్తదీయేషు ధిష్ణ్యే-

-ష్వాస్థాయ స్వాన్ విధేయాన్ స్వయమగమదసౌ శక్రతాం విక్రమేణ |

తం సామాత్యాప్తమిత్రం మహిషమపి నిహత్యాస్య మూర్ధాధిరూఢాం

దుర్గాం దేవీం ప్రపద్యే శరణమహమశేషాపదున్మూలనాయ || 2 ||

 

విశ్వోత్పత్తిప్రణాశస్థితివిహృతిపరే దేవి ఘోరామరారి-

-త్రాసాత్త్రాతుం కులం నః పునరపి చ మహాసంకటేష్వీదృశేషు |

ఆవిర్భూయాః పురస్తాదితి చరణనమత్సర్వగీర్వాణవర్గాం

దుర్గాం దేవీం ప్రపద్యే శరణమహమశేషాపదున్మూలనాయ || 3 ||

 

హంతుం శుంభం నిశుంభం విబుధగణనుతాం హేమడోలాం హిమాద్రా-

-వారూఢాం వ్యూఢదర్పాన్ యుధి నిహతవతీం ధూమ్రదృక్చండముండాన్ |

చాముండాఖ్యాం దధానాం ఉపశమితమహారక్తబీజోపసర్గాం

దుర్గాం దేవీం ప్రపద్యే శరణమహమశేషాపదున్మూలనాయ || 4 ||

 

బ్రహ్మేశస్కందనారాయణకిటినరసింహేంద్రశక్తీః స్వభృత్యాః

కృత్వా హత్వా నిశుంభం జితవిబుధగణం త్రాసితాశేషలోకం |

ఏకీభూయాథ శుంభం రణశిరసి నిహత్యాస్థితామాత్తఖడ్గాం

దుర్గాం దేవీం ప్రపద్యే శరణమహమశేషాపదున్మూలనాయ || 5 ||

 

ఉత్పన్నా నందజేతి స్వయమవనితలే శుంభమన్యం నిశుంభం

భ్రామర్యాఖ్యారుణాఖ్యా పునరపి జననీ దుర్గమాఖ్యం నిహంతుం |

భీమా శాకంభరీతి త్రుటితరిపుభటాం రక్తదంతేతి జాతాం

దుర్గాం దేవీం ప్రపద్యే శరణమహమశేషాపదున్మూలనాయ || 6 ||

 

త్రైగుణ్యానాం గుణానాం అనుసరణకలాకేలి నానావతారైః

త్రైలోక్యత్రాణశీలాం దనుజకులవనవహ్నిలీలాం సలీలాం |

దేవీం సచ్చిన్మయీం తాం వితరితవినమత్సత్రివర్గాపవర్గాం

దుర్గాం దేవీం ప్రపద్యే శరణమహమశేషాపదున్మూలనాయ || 7 ||

 

సింహారూఢాం త్రినేత్రీం కరతలవిలసచ్ఛంఖచక్రాసిరమ్యాం

భక్తాభీష్టప్రదాత్రీం రిపుమథనకరీం సర్వలోకైకవంద్యాం |

సర్వాలంకారయుక్తాం శశియుతమకుటాం శ్యామలాంగీం కృశాంగీం

దుర్గాం దేవీం ప్రపద్యే శరణమహమశేషాపదున్మూలనాయ || 8 ||

 

త్రాయస్వ స్వామినీతి త్రిభువనజనని ప్రార్థనా త్వయ్యపార్థా

పాల్యంతేఽభ్యర్థనాయాం భగవతి శిశవః కింత్వనన్యాః జనన్యాః |

తత్తుభ్యం స్యాన్నమస్యేత్యవనతవిబుధాహ్లాదివీక్షావిసర్గాం

దుర్గాం దేవీం ప్రపద్యే శరణమహమశేషాపదున్మూలనాయ || 9 ||

 

ఏతం సంతః పఠంతు స్తవమఖిలవిపజ్జాలతూలానలాభం

హృన్మోహధ్వాంతభానుప్రథితమఖిలసంకల్పకల్పద్రుకల్పం |

దౌర్గం దౌర్గత్యఘోరాతపతుహినకరప్రఖ్యమంహోగజేంద్ర-

-శ్రేణీపంచాస్యదేశ్యం విపులభయదకాలాహితార్క్ష్యప్రభావం || 10 ||

 

|| ఇతి ఆపదున్మూలన శ్రీ దుర్గా స్తోత్రం సంపూర్ణం ||