Giridhaaryastakam – శ్రీ గిరిధార్యాష్టకం
త్ర్యైలోక్యలక్ష్మీమదభృత్సురేశ్వరో
యదా ఘనైరంతకరైర్వవర్షహ |
తదాకరోద్యః స్వబలేన రక్షణం
తం గోపబాలం గిరిధారిణం భజే || 1 ||
యః పాయయంతీమధిరుహ్య పూతనాం
స్తన్యం పపౌ ప్రాణపరాయణః శిశుః |
జఘాన వాతాయితదైత్యపుంగవం
తం గోపబాలం గిరిధారిణం భజే || 2 ||
నందవ్రజం యః స్వరుచేందిరాలయం
చక్రే దిగీశాన్ దివి మోహవృద్ధయే |
గోగోపగోపీజనసర్వసౌఖ్యకృత్
తం గోపబాలం గిరిధారిణం భజే || 3 ||
యం కామదోగ్ధ్రీ గగనావృతైర్జలైః
స్వజ్ఞాతిరాజ్యే ముదితాభ్యషించత |
గోవిందనామోత్సవకృద్వ్రజౌకసాం
తం గోపబాలం గిరిధారిణం భజే || 4 ||
యస్యాననాబ్జం వ్రజసుందరీజనా
దినక్షయే లోచనషట్పదైర్ముదా |
పిబంత్యధీరా విరహాతురా భృశం
తం గోపబాలం గిరిధారిణం భజే || 5 ||
బృందావనే నిర్జరబృందవందితే
గాశ్చారయన్యః కలవేణునిస్స్వనః |
గోపాంగనాచిత్తవిమోహమన్మథస్తం
గోపబాలం గిరిధారిణం భజే || 6 ||
యః స్వాత్మలీలారసదిత్సయా సతా-
మావిశ్యకారాఽగ్నికుమారవిగ్రహం |
శ్రీవల్లభాధ్వానుసృతైకపాలకస్తం
గోపబాలం గిరిధారిణం భజే || 7 ||
గోపేంద్రసూనోర్గిరిధారిణోఽష్టకం
పఠేదిదం యస్తదనన్యమానసః |
సముచ్యతే దుఃఖమహార్ణవాద్భృశం
ప్రాప్నోతి దాస్యం గిరిధారిణే ధ్రువం
|| 8 ||
ప్రణమ్య సంప్రార్థయతే తవాగ్రత-
-స్త్వదంఘ్రిరేణుం రఘునాథనామకః |
శ్రీవిఠ్ఠలానుగ్రహలబ్ధసన్మతి-
-స్తత్పూరయైతస్య మనోరథార్ణవం || 9 ||
|| ఇతి శ్రీరఘునాథప్రభు కృత శ్రీ గిరిరాజధార్యష్టకం సంపూర్ణం ||