Devi Navaratna Malika Stotram - దేవి
నవరత్న మాలికా స్తోత్రం
హారనూపురకిరీటకుండల విభూషితావయవశోభినీం
కారణేశవరమౌలికోటి పరికల్ప్యమానపదపీఠికాం|
కాలకాలఫణిపాశబాణ ధనురంకుశామరుణమేఖలాం
ఫాలభూతిలకలోచనాం మనసి భావయామి పరదేవతాం ||1||
గంధసారఘనసారచారు నవనాగవల్లిరసవాసినీం
సాంధ్యరాగమధురాధరాభరణ సుందరాననశుచిస్మితామ్|
మంధరాయతవిలోచనా మమలబాలచంద్రకృతశేఖరీం
ఇందిరారమణసోదరీం మనసి భావయామి పరదేవతాం ||2||
స్మేరచారుముఖమండలాం విమలగండలంబిమణిమండలాం
హారదామపరిశోభమానకుచభార భీరుతనుమధ్యమామ్|
వీరగర్వహరనూపురాం వివిధకారణేశ వరపీఠికాం
మారవైరి సహచారిణీం మనసి భావయామి పరదేవతాం ||3||
భూరిభారధరకుండలీంద్ర మణిబద్ధభూవలయపీఠికాం
వారిరాశిమణిమేఖలావలయ వహ్నిమండలశరీరిణీమ్|
వారిసారవహకుండలాం గగన శేఖరీం చ పరమాత్మికాం
చారుచంద్రవిలోచనాం మనసిభావయామి పరదేవతాం ||4||
కుండలత్రివిధకోణమండల విహారషడ్దలసముల్లసత్
పుండరీక ముఖభేదినీం చ ప్రచండభానుభాసముజ్జ్వలామ్|
మండలేందుపరివాహితా ఽ మృతతరంగిణీమరుణరూపిణీం
మండలాంతమణిదీపికాం మనసి భావయామి పరదేవతాం ||5||
వారణాననమయూరవాహ ముఖదాహవారణపయోధరాం
చారణాదిసురసుందరీ చికురశేకరీకృతపదాంబుజామ్|
కారణాధిపతిపంచకప్రకృతి కారణప్రథమమాతృకాం
వారణాంత ముఖపారణాం మనసి భావయామి పరదేవతాం ||6||
పద్మకాంతిపదపాణిపల్లవపయోధరా ననసరోరుహాం
పద్మరాగమణిమేఖలావలయనీ విశోభితనితంబినీమ్|
పద్మసంభవసదాశివాంతమయ పంచరత్నపదపీఠికాం
పద్మినీం ప్రణవరూపిణీం మనసి భావయామి పరదేవతాం ||7||
ఆగమప్రణవపీఠికామమలవర్ణ మంగళశరీరిణీం
ఆగమావయవశోభినీమఖిలవేద సారకృతశేఖరీమ్|
మూలమంత్ర ముఖమండలాం ముదితనాదబిందునవయౌవనాం
మాతృకాం త్రిపురసుందరీం మనసి భావయామి పరదేవతాం ||8||
కాలికాతిమిర కుంతలాంతఘన భృంగమంగళవిరాజినీం
చూలికాశిఖరమాలికావలయ మల్లికాసురభిసౌరభామ్|
వాలికామధురగండమండల మనోహరాననసరోరుహాం
కాలికామఖిలనాయికాం మనసి భావయామి పరదేవతాం ||9||
నిత్యమేవ నియమేన జల్పతాం భుక్తి ముక్తి ఫలదా మభీష్టదామ్|
శంకరేణ రచితాం సదాజపేత్ నామరత్న నవరత్నమాలికామ్ ||10||