Bhaja Govindam (Moha Mudgaram) – భజ
గోవిందం (మోహ ముద్గరం)
|| భజ గోవిందం భజ గోవిందం గోవిందం
భజ మూఢమతే ||
సంప్రాప్తే సన్నిహితే
కాలే
నహి నహి రక్షతి డుకృంకరణే
భజ గోవిందం భజ గోవిందం
గోవిందం భజ మూఢమతే || 1 ||
మూఢ జహీహి ధనాగమతృష్ణాం
కురు సద్బుద్ధిం మనసి వితృష్ణామ్
|
యల్లభసే నిజకర్మోపాత్తం
విత్తం తేన వినోదయ చిత్తం
భజ గోవిందం భజ గోవిందం
గోవిందం భజ మూఢమతే || 2 ||
నారీస్తనభర నాభీదేశం
దృష్ట్వా మా గా మోహావేశం |
ఏతన్మాంసవసాదివికారం
మనసి విచింతయ వారం వారమ్
భజ గోవిందం భజ గోవిందం
గోవిందం భజ మూఢమతే || 3 ||
నలినీదల గతజలమతితరలం
తద్వజ్జీవితమతిశయ చపలం |
విద్ధి
వ్యాధ్యభిమానగ్రస్తం
లోకం శోకహతం చ సమస్తం
భజ గోవిందం భజ గోవిందం
గోవిందం భజ మూఢమతే || 4 ||
యావద్విత్తోపార్జనసక్తః
తావన్నిజపరివారో రక్తః |
పశ్చాజ్జీవతి జర్జరదేహే
వార్తాం కోఽపి న పృచ్ఛతి
గేహే
భజ గోవిందం భజ గోవిందం
గోవిందం భజ మూఢమతే || 5 ||
యావత్పవనో నివసతి దేహే
తావత్పృచ్ఛతి కుశలం గేహే |
గతవతి వాయౌ దేహాపాయే
భార్యా బిభ్యతి
తస్మిన్కాయే
భజ గోవిందం భజ గోవిందం
గోవిందం భజ మూఢమతే || 6 ||
బాలస్తావత్క్రీడాసక్తః
తరుణస్తావత్తరుణీసక్తః |
వృద్ధస్తావచ్చింతాసక్తః
పరమే బ్రహ్మణి కోఽపి న
సక్తః
భజ గోవిందం భజ గోవిందం
గోవిందం భజ మూఢమతే || 7 ||
కా తే కాంతా కస్తే పుత్రః
సంసారోఽయమతీవ విచిత్రః |
కస్య త్వం కః కుత ఆయాతః
తత్త్వం చింతయ తదిహ
భ్రాతః
భజ గోవిందం భజ గోవిందం
గోవిందం భజ మూఢమతే || 8 ||
సత్సంగత్వే నిస్సంగత్వం
నిస్సంగత్వే నిర్మోహత్వమ్
|
నిర్మోహత్వే
నిశ్చలతత్త్వం
నిశ్చలతత్త్వే
జీవన్ముక్తిః
భజ గోవిందం భజ గోవిందం
గోవిందం భజ మూఢమతే || 9 ||
వయసి గతే కః కామవికారః
శుష్కే నీరే కః కాసారః |
క్షీణే విత్తే కః పరివారః
జ్ఞాతే తత్త్వే కః సంసారః
భజ గోవిందం భజ గోవిందం
గోవిందం భజ మూఢమతే || 10 ||
మా కురు ధన జన యౌవన గర్వం
హరతి నిమేషాత్కాలః సర్వం |
మాయామయమిదమఖిలం హిత్వా
బ్రహ్మపదం త్వం ప్రవిశ
విదిత్వా
భజ గోవిందం భజ గోవిందం
గోవిందం భజ మూఢమతే || 11 ||
దినయామిన్యౌ సాయం ప్రాతః
శిశిరవసంతౌ పునరాయాతః |
కాలః క్రీడతి గచ్ఛత్యాయుః
తదపి న ముంచత్యాశావాయుః
భజ గోవిందం భజ గోవిందం
గోవిందం భజ మూఢమతే || 12 ||
కా తే కాంతా ధనగతచింతా
వాతుల కిం తవ నాస్తి
నియంతా |
త్రిజగతి సజ్జనసంగతిరేకా
భవతి భవార్ణవతరణే నౌకా
భజ గోవిందం భజ గోవిందం
గోవిందం భజ మూఢమతే || 13 ||
ద్వాదశ మంజరికాభిరశేషః
కథితో వైయాకరణస్యైషః |
ఉపదేశోఽభూద్విద్యా నిపుణైః
శ్రీమచ్ఛంకర భగవచ్ఛరణైః
భజ గోవిందం భజ గోవిందం
గోవిందం భజ మూఢమతే || 14 ||
జటిలో ముండీ లుంఛితకేశః
కాషాయాంబర బహుకృతవేషః |
పశ్యన్నపి చ న పశ్యతి
మూఢః
ఉదరనిమిత్తం బహుకృతవేషః
భజ గోవిందం భజ గోవిందం
గోవిందం భజ మూఢమతే || 15 ||
అంగం గలితం పలితం ముండం
దశనవిహీనం జాతం తుండమ్ |
వృద్ధో యాతి గృహీత్వా
దండం
తదపి న ముంచత్యాశాపిండమ్
భజ గోవిందం భజ గోవిందం
గోవిందం భజ మూఢమతే || 16 ||
అగ్రే వహ్నిః పృష్ఠే
భానుః
రాత్రౌ చుబుక సమర్పిత జానుః
|
కరతల భిక్షస్తరుతలవాసః
తదపి న ముంచత్యాశాపాశః
భజ గోవిందం భజ గోవిందం
గోవిందం భజ మూఢమతే || 17 ||
కురుతే గంగాసాగరగమనం
వ్రత పరిపాలనమథవా దానమ్ |
జ్ఞానవిహీనః సర్వమతేన
భజతి న ముక్తిం జన్మశతేన
భజ గోవిందం భజ గోవిందం
గోవిందం భజ మూఢమతే || 18 ||
సురమందిర తరు మూల నివాసః
శయ్యా భూతలమజినం వాసః |
సర్వ పరిగ్రహ భోగత్యాగః
కస్య సుఖం న కరోతి విరాగః
భజ గోవిందం భజ గోవిందం
గోవిందం భజ మూఢమతే || 19 ||
యోగరతో వా భోగరతో వా
సంగరతో వా సంగవిహీనః |
యస్య బ్రహ్మణి రమతే
చిత్తం
నందతి నందతి నందత్యేవ
భజ గోవిందం భజ గోవిందం
గోవిందం భజ మూఢమతే || 20 ||
భగవద్గీతా కించిదధీతా
గంగాజల లవకణికా పీతా |
సకృదపి యేన మురారిసమర్చా
క్రియతే తస్య యమేన న
చర్చా
భజ గోవిందం భజ గోవిందం
గోవిందం భజ మూఢమతే || 21 ||
పునరపి జననం పునరపి మరణం
పునరపి జననీజఠరే శయనం |
ఇహ సంసారే బహుదుస్తారే
కృపయాఽపారే పాహి మురారే
భజ గోవిందం భజ గోవిందం
గోవిందం భజ మూఢమతే || 22 ||
రథ్యాచర్పట విరచిత కంథః
పుణ్యాపుణ్య వివర్జిత
పంథః |
యోగీ యోగనియోజిత చిత్తః
రమతే బాలోన్మత్తవదేవ
భజ గోవిందం భజ గోవిందం
గోవిందం భజ మూఢమతే || 23 ||
కస్త్వం కోఽహం కుత ఆయాతః
కా మే జననీ కో మే తాతః |
ఇతి పరిభావయ సర్వమసారం
విశ్వం త్యక్త్వా
స్వప్నవిచారం
భజ గోవిందం భజ గోవిందం
గోవిందం భజ మూఢమతే || 24 ||
త్వయి మయి చాన్యత్రైకో
విష్ణుః
వ్యర్థం కుప్యసి
మయ్యసహిష్ణుః |
భవ సమచిత్తః సర్వత్ర త్వం
వాంఛస్యచిరాద్యది
విష్ణుత్వం
భజ గోవిందం భజ గోవిందం
గోవిందం భజ మూఢమతే || 25 ||
శత్రౌ మిత్రే పుత్రే బంధౌ
మా కురు యత్నం విగ్రహసంధౌ
|
సర్వస్మిన్నపి
పశ్యాత్మానం
సర్వత్రోత్సృజ భేదాజ్ఞానం
భజ గోవిందం భజ గోవిందం
గోవిందం భజ మూఢమతే || 26 ||
కామం క్రోధం లోభం మోహం
త్యక్త్వాఽఽత్మానం పశ్యతి
సోఽహం |
ఆత్మజ్ఞానవిహీనా మూఢాః
తే పచ్యంతే నరకనిగూఢాః
భజ గోవిందం భజ గోవిందం
గోవిందం భజ మూఢమతే || 27 ||
గేయం గీతా నామసహస్రం
ధ్యేయం శ్రీపతి రూపమజస్రం
|
నేయం సజ్జన సంగే చిత్తం
దేయం దీనజనాయ చ విత్తం
భజ గోవిందం భజ గోవిందం
గోవిందం భజ మూఢమతే || 28 ||
సుఖతః క్రియతే కామాభోగః
పశ్చాదంత శరీరే రోగః |
యద్యపి లోకే మరణం శరణం
తదపి న ముంచతి పాపాచరణం
భజ గోవిందం భజ గోవిందం
గోవిందం భజ మూఢమతే || 29 ||
అర్థమనర్థం భావయ నిత్యం
నాస్తితతః సుఖలేశః సత్యం |
పుత్రాదపి ధనభాజాం భీతిః
సర్వత్రైషా విహితా రీతిః
భజ గోవిందం భజ గోవిందం
గోవిందం భజ మూఢమతే || 30 ||
ప్రాణాయామం ప్రత్యాహారం
నిత్యానిత్య వివేకవిచారం |
జాప్యసమేతసమాధివిధానం
కుర్వవధానం మహదవధానం
భజ గోవిందం భజ గోవిందం
గోవిందం భజ మూఢమతే || 31 ||
గురుచరణాంబుజ నిర్భరభక్తః
సంసారాదచిరాద్భవ ముక్తః |
సేంద్రియమానస నియమాదేవం
ద్రక్ష్యసి నిజహృదయస్థం
దేవం
భజ గోవిందం భజ గోవిందం
గోవిందం భజ మూఢమతే || 32 ||
మూఢః కశ్చన వైయాకరణో
డుఃకృంకరణాధ్యయనధురీణః |
శ్రీమచ్ఛంకర భగవచ్ఛిష్యైః
బోధిత ఆసీచ్ఛోధిత కరణః
భజ గోవిందం భజ గోవిందం
గోవిందం భజ మూఢమతే || 33 ||
భజ గోవిందం భజ గోవిందం
గోవిందం భజ మూఢమతే |
నామస్మరణాదన్యముపాయం
నహి పశ్యామో భవతరణే
భజ గోవిందం భజ గోవిందం
గోవిందం భజ మూఢమతే || 34 ||