కార్తిక మాసానికి ఇంతటి పవిత్రత చేకూరడం వెనుక
ఉన్న రహస్యమేమిటి?
కార్తీక మాసంలో దాగిఉన్న
దివ్యమైన రహస్యం తెలుసుకుందాం!
ఈ నెల రోజులు ఏం చేస్తే
పుణ్యఫలం లభిస్తుంది?
మహిమాన్వితమైన కార్తిక
మాసంలో భక్తి శ్రద్ధలతో ఈ విధంగా చేస్తే సకల భోగభాగ్యాలను అనుభవించి, జన్మరాహిత్యాన్ని పొందవచ్చు!
అన్ని మాసాలలోకెల్లా
కార్తిక మాసం అత్యంత పవిత్రమైనది. ఇటు శివునికి, అటు విష్ణువుకు కూడా ప్రీతికరమైన మాసం కార్తిక మాసం.
ఆధ్యాత్మిక సాధకులకు మోక్ష మార్గం అనడం ఎలాంటి సందేహం లేదు. అసలు కార్తిక మాసానికి
ఇంతటి పవిత్రత చేకూరడం వెనుక ఉన్న రహస్యమేమిటి? కార్తికమాస విశిష్టత గురించి ఈ కథనంలో తెలుసుకుందాం.
కార్తీక మాసమని పేరు-
శరదృతువులో వచ్చే కార్తిక
మాసంలో పున్నమి రోజున చంద్రుడు కృత్తికా నక్షత్రంలో సంచరిస్తాడు. కాబట్టి ఈ
మాసానికి కార్తిక మాసమని పేరు వచ్చింది. తెలుగు మాసాల్లో తొమ్మిదో మాసమైన కార్తిక
మాసం అన్ని మాసాల్లో కెల్లా ఉత్తమమైనది.
కార్తీకానికి సమానమైన మాసం లేదు-
స్కంద పురాణం ప్రకారం, కార్తిక మాసానికి సమానమైన మాసం, శ్రీ మహా విష్ణువుకు సమానమైన దేవుడు, గంగతో సమానమైన తీర్ధము, వేదాన్ని మించిన శాస్త్రం లేదని తెలుస్తోంది.
హరిహరులకు ప్రీతికరం కార్తీకం-
హిందూ సంప్రదాయం ప్రకారం, సనాతన ధర్మాన్ని అనుసరించి ఒక ఏడాదిని రెండు ఆయనములుగా
విభజిస్తారు. అందులో మొదటిది ఉత్తరాయణం రెండోది దక్షిణాయనం. ఉత్తరాయణంలో మాఘ
మాసానికి ఎంతటి విశిష్టత ఉందో, దక్షిణాయనంలో
కార్తిక మాసానికి అంతే విశిష్టత ఉంది. ఈ పవిత్ర కార్తిక మాసం హరిహరులకు
ప్రీతికరమైన మాసం. కార్తిక మాసంలో చేసే శివారాధనకు విశేష పుణ్యఫలం లభిస్తుందని
కార్తీక పురాణం చెబుతోంది. ఈ సందర్భంగా కార్తీక మాసంలో హరిహరులు అనుగ్రహం కోసం ఏమి
చేయాలో తెలుసుకుందాం.
1. నదీస్నానం-
కార్తీక మాసంలో నదీ
స్నానానికి అత్యంత ప్రాధాన్యం ఉంది. ఋషులు, సిద్ధులు, మహర్షులు, కార్తిక
మాసం అన్ని రోజులు పవిత్ర నదీ తీరాల్లో సంచరిస్తూ ఈ మాసమంతా కార్తిక స్నానం
ఆచరిస్తుంటారు. కార్తిక మాసంలో గంగ, గోదావరి, కృష్ణ, కావేరి, యమునా, వంటి
పుణ్య నదుల్లోనే కాకుండా చెరువులు, నీటికుంటలు, సముద్రాల్లో కూడా స్నానమాచరించవచ్చునని స్కంద
పురాణాంతర్గతమైన కార్తిక పురాణంలో వివరించి ఉంది.
2 . దీపారాధన-
కార్తీక మాసంలో ఉదయం
సాయంత్రం దేవాలయంలో దీపారాధన చేయడం
మంచిది. వీలుకానివారు ఇంటిలో మరియు బయట ఉన్న తులసికోట దగ్గర దీపం పెట్టుకోవడం
మంచిదే. శివాలయంలో దీపాలు వెలిగించడం వల్ల పాపాలు తొలగి పుణ్యాలు చేకూరుతాయని
పురాణాలు చెబుతున్నాయి. ఈ మాసంలో తెలిసి కానీ తెలియక కానీ చివరకు చెడు తలపుతో
అయినా సరే దీపం వెలిగిస్తే, ఆ
ఫలితం లెక్క కట్టలేనిది. భక్తి శ్రద్ధలతో శివాలయంలో చేసే దీపారాధన కూడా ఎంతో పుణ్య
ఫలాన్నిస్తుంది. కార్తీక మాసంలో దీపారాధన ఉన్న ప్రాధాన్యత గురించి కార్తీక
పురాణంలో విపులంగా వివరించి ఉంది.
3. దానాలు-
స్కంద పురాణం ప్రకారం
సంపాదించినా ధనానికి సార్ధకత దానంతోనే పుణ్యాఫలం చేకూరుతుందని వివరిస్తోంది.
కార్తీక మాసంలో చేసే దానాలకు మాములు కన్నా కోటిరెట్ల అధిక ఫలం లభిస్తుంది. ఈ
మాసంలో అన్నదానం, వస్త్రదానం, గోదానం, భూదానం, దీపదానం, సాలగ్రామ
దానం వంటి దానాలతో ఇటు ఇహలోకంలో, అటు
పరలోకంలో కూడా తరించవచ్చని శాస్త్రాలు చెబుతున్నాయి. ముఖ్యంగా కార్తీక మాసంలో
కన్యాదానం చేస్తే అటు ఏడు తరాలు, ఇటు
ఏడు తరాలు తరిస్తాయని, మరియు గతించిన
పూర్వీకులకు సద్గతులు కలుగుతాయని కార్తిక పురాణం చెబుతోంది.
4. ఉపవాసం-
కార్తీక మాసమంతా నక్తం
పేరుతో ఉపవాసాలు ఆచరిస్తుంటారు. ఉదయం నుంచి సాయంత్రం వరకు ఆహారం తీసుకోకుండా, దేవాలయ దర్శనం
దైవారాధనలోనే మనసును లగ్నం చేసి సాయంత్రం నక్షత్ర దర్శనం తరువాత భోజనం
చేయడాన్ని నక్తం అంటారు. ఇలా కార్తిక మాసంలో ఉపవాసాలు ఆచరించడం వలన దైవానుగ్రహంతో
పటు శుభాలు చేకూరుతాయని పండితులు చెబుతున్నారు. అంతేకాదు ఉపవాసాల వలన మంచి ఆరోగ్యం
కూడా సమకూరుతుందని శాస్త్రీయంగా ఋజువు చేయబడింది.
5. పురాణ పఠనం-
కార్తీక మాసంలో ప్రతిరోజూ
కార్తీక పురాణంలో ఒక్కో అధ్యాయం చొప్పున
చదివినా, విన్నా, రాసినా కలిగే పుణ్యం అనంతం.
6. కార్తిక సోమవారం-
కార్తిక మాసంలో వచ్చే
అన్ని సోమవారాలు శివారాధనకు ప్రత్యేకమైనవి.
7. భూలోక వైకుంఠం-
'హర హర
మహాదేవ శంభో శంకర' అంటూ అభిషేకాలతో
శివాలయాలు మారు మ్రోగుతుంటే, మరో
వైపు శ్రీ సత్యనారాయణ స్వామి వ్రతాలతో, ఏకాదశి
ఉపవాసాలతో విష్ణు సహస్రనామ పారాయణలతో భూలోకం వైకుంఠాన్ని తలపించేలా ఉండే ఈ కార్తిక
మాసం మోక్షదాయకం. ఇంతటి మహిమాన్వితమైన కార్తిక మాసంలో భక్తి శ్రద్ధలతో
హరిహరాదులును ఆరాధిస్తూ, నియమ నిష్టలతో నదీ స్నానాలు, ధానధర్మాలు, ఉపవాసాలు, దీపారాధనలు చేస్తూ ఇహంలో
సకల భోగభాగ్యాలను అనుభవించి, జన్మరాహిత్యాన్ని
పొందవచ్చునని కార్తిక పురాణంలో సూత మహాముని వివరించారు.
ఓం నమః శివాయ!
ఓం నమో నారాయణాయ!