Srihansh: Poli Padyami: పోలి పాడ్యమి పోలి స్వర్గం నోము ప్రాశస్త్యం

పోలిదీపాలను అమావాస్య రోజున కాకుండా, మర్నాడు వచ్చే పాడ్యమి (పోలి పాడ్యమి)రోజున వెలిగించుకోవాలి.

పోలి స్వర్గం నోము ప్రాశస్త్యం - పోలిస్వర్గం కధ

పోలిస్వర్గం నోమ అనేది కార్తీక మాసం అంతటా మహిళలు అత్యంత ఉత్సాహంగా జరుపుకునే నోము. పురాతన కాలం నుండి కార్తీక మాసంలో మహిళలను ప్రభావితం చేసిన నోములలో ఒకటి పోలిస్వర్గం నోమ.

ఆశ్వయుజ అమావాస్య రోజు నుండి కార్తీక అమావాస్య రోజు వరకు, నదిలో స్నానం చేసి తెల్లవారుజామున దీపాలు వెలిగించలేని వారు ఈ పోలిస్వర్గంలో ఉదయాన్నే లేచి, నదిలో స్నానం చేసి, అరటి ఆకులో దీపాలు వెలిగించి, వాటిని అక్కడే వదిలేస్తే, కార్తీకమాసం అంతా తెల్లవాఝామున నదీస్నానమాచరించిన ఫలితము, దీపములు వెలిగించిన ఫలితములు కలుగును.

ఈ రోజున, అందరు స్త్రీలు కలిసి నదిలో స్నానం చేసి, దాని ఒడ్డున దీపాలు వెలిగించి, ఉపవాసం ఉండి, బ్రాహ్మణోత్తమునలకు ఆహారం మరియు దీపదానములు ఇచ్చి ఆశీర్వాదములు పొందుతారు.

పొలమ్మ భక్తికి మెచ్చిన ఆ పరమశివుడు ఆమెను పుష్పక విమానంపై స్వర్గమునకు తీసుకువెళ్ళే వృత్తాంతమే పోలిస్వర్గం నోము కధ.

పోలి స్వర్గం నోము కధ:

ఒక మారుమూల ఊరిలో ఒక ఉమ్మడి కుటుంబం ఉండేది ఆ కుటుంబంలో ఐదుగురు కోడళ్లు ఉండేవారు. ఆ ఐదుగురు కోడళ్లలో చివరిది మరియు చిన్నది అయిన కోడలే పోలమ్మ. చిన్నప్పటి నుంచి కూడా పోలమ్మకు దైవభక్తి ఎక్కువగా ఉండేది. చిన్నప్పటి నుంచే పూజలన్నా, వ్రతాలన్నా మహా ఆసక్తి. పూలు కోయడం, పూజలు చేయడంతోనే ఆమె రోజువారీ జీవితం గడిచిపోయేది. ఆమెకు పెళ్లి జరిగేంత వరకూ దైవంతో ఆమె ఏర్పరచుకున్న అనుబంధానికి ఎలాంటి ఆటంకం కలగలేదు. కానీ పెళ్లి అయిన తరువాత ఆమె ఆనందానికి, భక్తికి ఆటంకాలు ఏర్పడ్డాయి. పూలు కోయడానికి, పూజలు చేయడానికి కనీసం గుడికి వెళ్లడానికి కూడా వీలు లేకుండా పోయింది. అందుకు కారణం ఆమె అత్తగారు. తనంతటి భక్తురాలు వేరొకరు లేరని ఆ అత్తగారి ఆహం. ఆచారాలని పాటించే హక్కు ఆమెకే ఉందన్నది ఆమె ఆహంభావం. ఇంటి కోడలకి దైవభక్తి ఎక్కువగా వుంటే సాధారణంగా ఎవరైనా మెచ్చుకుంటారు. కానీ పోలి విషయంలో అది తారుమారైంది. పోలి అత్తకు తాను మహా భక్తురాలిననే గర్వం ఎక్కువగా ఉండేది. కొంతమంది చుట్టుపక్కల వారు కూడా ఆమె వెనకచేరి భజన చేయడం వలన ఆమెలో మరింత అహంకారం పెరిగింది. తన కోడలు పోలి కారణంగా తనకున్న పేరు కాస్తా పోతుందని భావించి ఆమెను మాత్రం ఇంటి పట్టున వుంచి, మిగతా కోడళ్ళను తీసుకుని గుడికి వెళ్లి వచ్చేది. చిన్న కోడలు పోలి "స్వామి! పుండరీకాక్షా! గోవిందా! జనార్ధనా! అనాధరక్షకా! దీనబంధూ! దయ జూపుము అని వేడుకొనేది. ఈ నేపథ్యంలో ఒక కార్తీక అమావాస్య రోజున పోలికి ఇంటి పనులు పురమాయించి, ఆమెకి పూజా సామాగ్రి అందుబాటులో లేకుండా చేసి మిగతా కోడళ్లతో అత్త నదీ స్నానానికి వెళ్లింది. పోలి ఏ మాత్రం బాధపడకుండా, బావి దగ్గరే స్నానం చేసి, పత్తి చెట్టు నుంచి పత్తిని తీసి వత్తిని చేసింది. చల్ల కవ్వానికి వున్న వెన్నను తీసి దానితో దీపాన్ని వెలిగించి దైవానికి నమస్కరించింది. పోలి భక్తికి మెచ్చిన దైవం ఆమె కోసం పుష్పక విమానం పంపింది. ఊరిలో ఉన్న జనం చూస్తుండగానే పోలి ఆ విమానం ఎక్కింది. విమానం కొంచెం పైకి లేవగానే అక్కడికి వచ్చిన అత్త, తాను కాకుండా తన కోడలు స్వర్గానికి వెళ్లడానికి వీల్లేదంటూ పోలిని కిందకి లాగడానికి ఆమె కాళ్లు పట్టుకుంది.

ఆ వెంటనే మిగతా కోడళ్లు కూడా ఒకరి తరువాత ఒకరు ఒకరి కాళ్లు ఒకరు పట్టుకుని విమానం నుంచి కిందకి లాగుతూ వేలాడసాగారు. అది చూసిన దేవతలు పోలితో వారికి పోలిక లేదంటూ విమానం నుంచి కిందకి పడదోశారు. దేవదూతలు, పోలికి మాత్రమే స్వర్గానికి చేరుకునేంతటి నిష్కల్మషమైన మనసు ఉందని చెబుతూ వారిని కిందకి దించేశారు. పోలి నిర్మల, నిశ్చల భక్తికి ప్రతీక. పోలి మాత్రం బొందితో స్వర్గానికి వెళ్లిపోయింది.

అప్పటి నుంచి ప్రతి ఏడాది ఆశ్వయుజ అమావాస్య మొదలు కార్తీక అమావాస్య వచ్చే వరకూ ప్రతి నిత్యం (తెల్లవారుజామున) బ్రహ్మీ ముహూర్తంలో నిద్రలేచి నదీ స్నానం చేసి దీపం వెలిగించి పోలి కథ చెప్పుకుని అక్షింతలు తలపై వేసుకోవడం ఆనవాయతీగా వస్తోంది. ఈ విధంగా నెల రోజుల పాటు నదీ స్నానం నోము పూర్తయ్యాక కార్తీక అమావాస్య రోజున బ్రాహ్మణుడికి దీపదానం ఇవ్వాల్సి ఉంటుంది.

పోలి పాడ్యమి: ఏమి చేయాలో తెలుసుకుందాం!

పోలిపాడ్యమి రోజున ఉదయాన్నే నిద్ర లేగిచి తలస్నానం చేసి, 30 వత్తుల దీపం వెలిగించాలి. దాన్ని అరటి దోప్పలలో పెట్టి పారుతున్న నీటిలో వదలాలి. తద్వారా కార్తీక మాస దీపారాధన పుణ్యం లభిస్తుందని నమ్మకం. ఆ తర్వాత శివాలయానికి వెళ్లి, శివ లింగానికి అభిషేకం చేసి "ఓం నమః శివాయ" అనే మంత్రాన్ని జపించాలి. సాయంత్రం వద్ద దీపాలు వెలిగించి, పోలి స్వర్గం కథ విని, దీపధానం చేస్తే శుభ ఫలితాలు కలుగుతాయని పండితులు చెబుతున్నారు.

నగర జీవితంలో మనకు దగ్గరలో చెరువులు, నదులు అందుబాటులో లేనివారు ఈ దీపాలను బావి దగ్గర ఇంకా ఇతర ప్రదేశాల్లో నీటిని నింపి వదిలేలా ఆచారం రూపాంతరం చెందింది. ఇలా వదిలిన అరటి దీపాలను చూసుకుంటూ పోలిని తల్చుకుంటారు. కార్తికమాసంలో ఏ రోజు దీపాన్ని వెలిగించలేకపోయినా కూడా ఈ రోజున 30 వత్తులను వెలిగించి నీటిలో వదిలితే, ఆ కార్తీక మాసమంతా దీపారాధన చేసిన పుణ్యం వస్తుందని చెబుతారు. వీలైనవారు ఈ రోజున బ్రహ్మ ణులకు దీపాన్ని కానీ, స్వయంపాకాన్ని కానీ దానం చేస్తుంటారు.